نور ضيفة على برنامج صاحبة السعادة

حلّت نور ضيفةً على برنامج “صاحبة السعادة” الذي تقدمه إسعاد يونس، وتصدرت الترند في مصر حيث تطرقت خلال اللقاء إلى عدة مواضيع منها تعاونها مع ياسر جلال وطبيعة حياتها كربة منزل إلى جانب علاقتها بمواقع التواصل الاجتماعي.

وتحدثت عن بداية انتقالها إلى مصر، وأشارت إلى أنها تأقلمت بسرعة مع مصر، وتابعت: “حبيت مصر وبسرعة غريبة.. لما جيت وقعدت طبعاً أول فترة بيحصل مواقف، بلد مش بلدي وكنت بتكلم مصري برضه بس مش زي دلوقتي، فكان في شوية حاجات تعودت عليها بس كان بسرعة”.

ولفتت إلى أنها بنت علاقات صداقة في كل مرة كانت تزور فيها مصر قبل انتقالها نهائياً إلى مصر.

ورداً على سؤال ان كانت ربة منزل لبنانية أو مصرية وعن ان كانت بمظهرها في المنزل أو لا، أجابت نور: “لما تكوني ست بيت هو موديل واحد.. في ساعات بقعور كده وفي ساعات ببقى واخدة بالي، وحسب شغلي كمان، حسب فترة في شغل كتير تعبانة مش تعبانة.. طبعاً ما حدش يجي وما يقوليش حتفتح له ست تانية مش دي”.

لافتةً إلى أنها ليست مستعدة كل يوم للوقوف أمام المرآة لساعتين في الوقت الذي تهتم فيه بأولادها.

وتطرقت إلى دورها في فيلم “الرهينة” وعن مخرجته ساندرا التي حاولت أن تقدم نور بشكل جديد، واعتبرت نور أن ساندرا كانت دافعاً لها لبذل مجهود كبير في الفيلم وتقديم شخصية مميزة فيه، وتعتبر نور أن “الرهينة” و”ملاكي اسكندرية” من أقرب الأفلام إلى قلبها، وقد تعاونت في الفيلمين مع أحمد عز.

عن مسلسل “جمال الحريم”، لفتت إلى أنها لا تحب مشاهدة هذا النوع من الأعمال التي تتناول مواضيع السحر والشعوذة، ولكنها قررت أن تخوض التجربة لتتعرف إلى نهاية هذا النوع من المواضيع.

وقالت: “أنا قلت حاعمل الشخصية دي وأشوف ايه اللي بيحصل مع هذه المواضيع البعيدة عنك، لازم تكون بعيدة عنك، وتشوفي عايزة تقولي ايه للناس من خلالها”.

ورداً على سؤال حول خوف مخرجة “جمال الحريم” منال الصيفي من قراءة التعويذات، قالت نور: “هي مش حتخاف لأن التعاويذ المكتوبة مش حقيقية، هي شبه الكلام والصوت بتاع الكلام، ما ينفعش يكون حقيقي”. وتابعت: “في مشهد ما حبيتوش، مشهد الزار، جابوا فرقة زار حقيقية.. أنا حسيت مش مرتاحة، كان في ست كبيرة وقفتني قدامها وقعدوا يقولولي أعمل ايه للمشهد التمثيلي، ولكن أنا من جوا مش مرتاحة.. حسيت المشهد ده أزعجني جداً”.

عن تعاونها مع ياسر جلال، قالت: “ياسر ممثل كبير طبعاً وموهبة كبيرة وخبرة كبيرة فتحسيه بيحتضن كل الناس، وعارف كل الناس ويحس مشاكلهم، يفهم على طول لو أنا واقفة في حاجة مضايقاني في المشهد يفهم على طول فيقولي في ايه ويساعدني.. انبسطت جداً في الشغل مع ياسر وعملت معاه مسلسل “رحيم” و “ضل راجل” رمضان اللي فات”.

وتحدثت نور عن أول سنة زواج وما الذي صدم زوجها: “عارفة احنا بنتعود مش حنصحى بدري كتير، وأنا جوزي شغله بيصحى بدري، واللبس وكده.. ولكي لا تستيقظ باكراً مع زوجها، قامت نور بنقل ملابس زوجها إلى الكوريدور في المنزل.. وتابعت: “ستة الصبح مش قادرة أصحى.. يا عيني اتصدم. فأول سنة جواز بتبقى غريبة”.

وعن الأمومة، كشفت نور أنها أصيبت باكتئاب: “بداية الأمومة كانت صعبة، وكان عندي اكتئاب بسبب المسؤولية والحبسة ومفيش اجازة من المسؤولية هو مش فيلم نخلصه ونرتاح، دا طفل مسؤول منك 24 ساعة، وفي الطفل التاني كنت فاهمة وتعودت”.

ولفتت إلى أن علاقتها بالسوشيال ميديا ضعيفة، وقالت: “أنا والسوشيال ميديا مش أصحاب”، مشيرةً إلى أنها لا تحب أن تظهر أولادها على السوشيال ميديا لأنها تشعر بأنهم لا يزالون في سن صغيرة على الشهرة، وخاصة ان شهرتهم ستكون نابعة من شهرة والدتهم أو والدهم، معبّرة عن رفضها لتلك الفكرة.